Myndir

Ymiskar myndir frá Heilsuhjálparafelag Føroya

Comments Box SVG iconsUsed for the like, share, comment, and reaction icons
Hetta er fyrsta brotið úr samgonguskjalinum, ið er viðkomandi fyri okkara limir og øll umsorganarstarvsfólk, ið Heilsuhjálparafelagið fer at deila á okkara heimasíðu, fb síðu og instagram í næstum. Tað er alneyðugt at "halda lív" í samgonguskjalinum, sum eina áminning til samgonguna!
Statusfundur við Betri Pensión á Heilsuhjálparafelagnum í gjár. Umboð fyri Betri ið møttu, vóru Helgi L. Petersen stjóri og Joan Stampe, pensjónsráðgevi.
UNDIRVÍSING Í FRONTOTEMPORAL DEMENS, fyri limir í Heilsuhjálparafelag Føroya Jónvør Christiansen, sjúkrarøktarfrøðingur og master í geriatriskari sjúkrarøkt, kemur at undirvísa í frontotemporal demens, týsdagin 21.02.2023 kl 15.00-17.30 Stað: Heilsuhjálparafelagið Tilmelding áðrenn 15. februar á tlf. 317725 ella t-post hhff@hhff.fo Luttøkugjald á 100 kr skal flytast á 9870- 9990993 Frontotemporal demens er eitt felags heiti fyri eina demenssjúku, sum serliga rakar fremsta partin av stórheilanum, tað er enniblaðið og vangalepan. Sjúkueyðkennini vísa seg við, at persónurin broytir atburð og eisini broytist málið ofta so líðandi. Øvut sjúkugongdini við alzheimer, har minnið tíðliga verður ávirkað, kann innlæring og minnið vera gott leingi í sjúkugongdini við frontaldemens. Hendan seinnapartin verður undirvíst í sjúkuorsøk, sjúkueyðkennum og námsfrøðiligum tiltøkum, har dentur verður lagdur á, at umsorganin tekur støði í persóninum, hansara lívssøgu, áhuga og avbjóðingum, sum skyldast sjúkuni. Heilsuhjálparafelag Føroya
Nýggjar tíðir fyri umsorganarøkið Tað var ein sonn fragd at lesa samgonguskjalið, har staðfest er, at øll valynskini hjá Heilsuhjálparafelag Føroya eru at finna har. Tað verður lagt upp til trípartasamstarv í samband við at stytta arbeiðsvikuna og tað fegnast felagið um, hóast at vit høvdu ynskt, at vikan bleiv stytt niður í 37 tímar í samgonguskeiðnum, heldur enn yvir 6 ár. Framskrivingar vísa, at tað verður tørvur á væl meiri fólki innan umsorganarøkini komandi árini. Samstundis eru lønirnar á júst hesum økjum so lágar, at tað er trupult at fáa nóg nógv fólk. Tí vil samgongan tryggja teimum lægst løntu bólkunum á hesum økjum eitt lønarlyft, eins og skattastigin verður broyttur fyri at økja arbeiðsútboðið og tað fegnast felagið sjálvsagt um. Vit hava í nøkur ár, arbeitt fyri og víst á, hvussu alneyðugt tað er, at heilsuhjálparanæmingar fáa løn undir útbúgving, tískil er orðingin av sera stórum týdningi at fáa við í samgonguskjalið,” Arbeitt verður fram ímóti at tryggja heilsuhjálparum løn undir útbúgving”. Hóast hetta er ein rund orðing, eru vit við gott mót og eru spent til trípartasamstarv, so vit fáa ta skilabestu avtaluna. Felagið hevur í fleri ár, arbeitt miðvíst fyri, rættin til at arbeiða fulla tíð fyri okkara limir og eru vit ávegis í arbeiðinum. Orðingin í samgonguskjalinum er at almenni arbeiðsmarknaðurin skal skipast soleiðis, at møguleikin at arbeiða fulla tíð kann tryggjast. Her er nógv gott í væntu aftrat, m.a at arbeitt verður við førleikamenning og førleikameting, skipan við vaksnamannalæru verður sett í verk. Sjúkradagpeningaskipanin hjá tímaløntum verður endurskoðað, og lógin um starvsmenn verður dagførd. Heilsuhjálparafelagið fer at fylgja neyvt við og bjóða inn til samstarv, so vit koma á mál við okkara ynskjum. Tað eru ymsar meiningar um samgonguskjalið, at har er ov lítil politikkur og ov nógvar óítøkiligar og bleytar orðingar. Men lat okkum nú síggja. Fyri Heilsuhjálparafelagið er tað eitt stórt stig á vegnum, at síggja at umsorganarøkið er raðfest og fara vit sum felag at gera alt fyri, at tað ikki bert eru føgur orð í einum samgonguskjali. Samstundis hava vit tiltrúgv til samgonguna, at tey fara at handla, fyri at framtíðartryggja umsorganarøkið. Hevur vælferðarøkið tað gott, hava vit øll tað gott. Eg skal her at enda, vegna Heilsuhjálparafelag Føroya, ynskja øllum tingfólkum, hjartaliga til lukku við valinum og teimum nýggju landsstýrisfólkunum til lukku við sessunum og ynskja tykkum blíðan byr og hepna hond, tit ið fara at stjórna okkara landi. Samstundis ein heilsan til fráfarandi samgongu, við takk fyri gott samstarv. Mary Antonsdóttir Forkvinna í Heilsuhjálparafelag Føroya
Heilsuhjálparafelag Føroya ynskir øllum sínum limum, viðskiftafólkum, samstarvspørtum, fylgjarum og annars øllum føroyingum, eini gleðilig jól og eitt av Harranum signað nýggjár, við takk fyri alt í brátt farna árið. <3
Tað skal loysa seg sum pensjónistur at arbeiða. Sum nú er, verður øll inntøka, ið er omanfyri 45.000 kr. um árið, mótroknað í pensjónini. Hetta merkir, at bæði arbeiðsinntøka og onnur inntøka sum ratupensjón og lívrenta telja við í teimum 45.000 kr. um árið. Hetta hevur stóra ávirkan á, í hvønn mun fólk, ið fara um pensjónsaldur, ynskja at halda fram á arbeiðsmarknaðinum, hóast tey eru væl fyri. Í Danmark kundi mann fram til endan av 2022, hava eina inntøku á 122.004 kr. um árið, áðrenn mann byrjaði at mótrokna í fólkapensjónini. Frá 1. januar 2023, verður arbeiðsinntøka ikki mótroknað longur og merkir hetta, at tað eingin forðing verður hjá fólki, ið fara um tey 67, at halda fram á arbeiðsmarknaðinum. Okkara áheitan á politikarar er, at mann ger sum í Danmark, og steðgar við at mótrokna í fólkapensjónini av arbeiðsinntøkuni. Vit mugu ásanna, at á eldraøkinum, eru nógv roynd starvsfólk, ið gott kunnu halda áfram at arbeiða, eftir at tey fylla 67 ár, men orsakað av, at mann verður knokkroyttur í fólkapensiónini, velja nógv at gevast at arbeiða. Hetta er sera óheppið, tí vit hava brúk fyri øllum góðum kreftum á umsorganarøkinum, har stórt starvsfólkatrot er, og ikki minst teimum royndu starvsfólkunum. Tað er spell fyri samfelagið, at eitt stórt tilfeingið, ikki verður gagnnýtt og hetta er eisini diskriminerandi aldurisma ið styggir okkara eldri føroyingar av arbeiðsmarknaðinum.
Sjálvandi fara heilsuhjálparanæmingar at fáa løn undir lesnaði. Tað ber snøgt sagt ikki til, at grundgeva fyri, IKKI at geva hesum týðandi starvsbólki løn. Tí hvør skal taka sær av okkara mammum, pápum, ommum og abbum, um vit ikki hava nokk av heilsuhjálparum at taka sær av teimum, tá tey eru vorðin gomul og óhjálpin? Alternativið er, at vit fara av arbeiðsmarknaðinum, fyri at taka okkum av okkara gomlu, tí trot er á heilsuhjálparum, men tað vildi verði eitt bakkast fyri alt samfelagið. Vit mugu ásanna, at í dag hava tey ungu eina rúgvu av útbúgvingarmøguleikum. Í Danmark hevur mann, líka síðani útbúgvingarnar vórðu settar á stovn, givið næmingum løn undir lesnaði. Hvussu ber tað til, at mann í Føroyum billar sær inn, at mann skal hava sama áhuga fyri útbúgvingini, við ikki at geva føroyingum sama møguleika? Tað er ein sannroynd at fólk við áhuga fyri okkara faki, setast aftur, tí tað fíggjarliga ikki ber til at hava dupult húsarhald og bert fáa studning. Tískil missa vit á hvørjum ári fólk, ið finna sær aðra yrkisleið. Land og kommunur eiga at seta seg saman, fyri at finna eina loysn, so at vit fáa útbúgvið nokk av heilsuhjálparum, til at taka sær av okkara gomlu. Okkara gomlu hava tað uppiborið, sum hava bygt hetta samfelagið upp, at tey fáa nøkur virðilig ellisár.
Hátíðarløta var fyri starvsfólkum í Heilsuhúsinum 1. desember og harímillum var Suzanne Hultgren. Suzanne hevur starvast í 35 ár á eldraøkinum og hevur verið álitisfólk eisini. Heilsuhjálparafelagið takkar Suzanne fyri gott samstarv øll árini og ynskir henni blíðan byr frameftir. 🌹🇫🇴🇩🇰❤️
Hvussu tryggja vit røktina? Normeringin skal fylgja arbeiðsbyrðini. Størri arbeiðsbyrða, starvsfólkatrot og alsamt fleiri uppgávur til einstaka starvsfólkið, hevur neiliga ávirkan á trivnaðin hjá bæði starvsfóki og borgara. Tá starvsfólk einans hava tíð at nøkta grundleggjandi tørvin hjá okkara eldru, gerast ellis- og røktarheim “goymslustøð” heldur enn heim við einum innihaldsríkum gerandisdegi. Við at gera eina lógarbundna normering, fáa vit: •Glaðari starvsfólk •Minni strongd •Øking av starvsfólkatilfeingi •Hægri góðsku í røktini •Lægri arbeiðsbyrðu •Betri trivna •Minking í sjúkrafráveru •Heildarrøkt •Betri samanhang í arbeiðinum •Betri skipaðan arbeiðsdag Minimumsnormering við lóg, er eitt krav til, hvussu nógv starvsfólk skulu verða sett í starv á einari deild, í mun til, hvussu nógv búfólk eru á deildini. Normeringin má gerast eftir tyngd og ikki bara eftir tali av búfólkum. Við at lógartryggja starvsfólkanormeringina, fer tað at forða fyri, at mann setur sparingar í verk í røktini.
Heilsuhjálparafelag Føroya, gjørdi nýggjan sáttmála í februar 2022. Sama mánað, brast kríggj á í Ukraina, ið førdi við sær, at brúkaraprístalið er vaksið munandi í 2022. Hetta merkir, at prísurin á øllum neyðsynjarvørum er hækkaður rættiliga nógv. Hesar ógvusligu príshækkingar viðføra, at láglønarbólkar eru millum tey ið fyrst kenna sviðan av hesi syrgiligu gongd. Sum dømi kann nevnast, at sambært tølum hjá hagstovu Føroya, var brúkaraprístalið í november 2021 3,4% meðan tað var 8,8% í august 2022. Her eigur politiska skipanin at skipa so fyri, at mann ger eina prístalsregulering av lønum, tá brúkaraprístalið veksur óvanliga nógv, sum nú í 2022. Ásannandi, at limirnir í Heilsuhjálparafelag Føroya, eru ein láglønarbólkur, er tað torført hjá teimum, at fáa endarnar at røkka saman. Allir prísir eru farnir munandi upp, bæði á matvørum, diesel, bensin, olju til húsarhald, renta av lánum, ja á øllum neyðsynjarvørum. Politikarin situr við valdinum, og umframt lønarhækkingar, hevur politikarin myndugleika at lækka MVG og onnur avgjøld uppá neyðsynjarvørur, so at fólk ikki enda í fátækraváða.
Góðu politikarar, vit eru ikki bert tvær heitar hendur og eingin heili. Hugsið tykkum tí um, hvussu tit umrøða okkum! Orð skapa veruleikar, tað er vert at leggja sær í geyma! Halda tit fast í, at umrøða heilsustarvsfólk sum tvær heitar hendur, altso praktiska partin av okkara arbeiði, so tiga tit burtur vitanargrundarlagið - hetta at veita rætta umsorgan. Tá tit nýta hugtakið heitar hendur, fasthalda tit retorikkinum, at røktarstarvsfólk eru tvær heitar hendur og eingin heili. Heitar hendur avspegla onga fakligheit. Hetta sendir eitt skeivt tekin um, at umsorganararbeiðið er javnsett við ólønt arbeiði. Fyri at veita umsorgan, krevst empati og fakligheit.
Samandráttur í vikuskiftis Sosialinum, frá ráðstevnuni í HOND OG OND, ið Heilsuhjálparafelagið skipaði fyri 27. okt. í Norðurlandahúsinum. Fleiri myndir frá ráðstevnuni verða at síggja á heimasíðuni í dag á hhff.fo
Hátíðarhald á Gerðisgarði í Skálavík í dag. Arna Lognberg hevur 42 ára starvsdag og Heilsuhjálparafelagið takkar fyri gott samstarv og ynskir Arnu blíðan byr frameftir. Fríðhild Winther, næstforkvinna, handaði Arnu gávu og blómur frá felagnum. 🌹🇫🇴🥰
Heinta meira

© 2023, Øll rættindi tilskila. Heilsuhjálparafelag Føroya  | 
Back to top button
Facebook
Facebook
fb-share-icon